CEBU, Philippines — Susihon sa Philippine Drug Enforcement Agency-7 ang mga kandidato kun aduna ba nilay nalambigit sa ilegal nga drugas karon nga nagsugod na sab ang panahon sa eleksyon sa May 2025.
Ang tigpamaba sa PDEA-7 nga si Leia Alcantara nagkanayon nga gisugdan na nila ang pagtan-aw background sa politikong nanagan apil na ang ang posibilidad kun aduna ba’y mga sindikato sa illegal nga drugas ang nagpaluyo kanila pinaagi sa paghatag og pundo alang sa eleksyon.
Matud ni Alcantara ang mga sindikato maka-impluwensya kini og dako sa mga politiko isip direktang tigpundo o mga third-party sponsors.
“Duha man na siya ka paagi. Ang politiko aware nga naa siya’y funding from a syndicate or drug personality and willing ra niya dawaton or ang politiko unaware siya kay ipaagi sa laing tawo. Still it’s the same, nag gamit sila og funds from illegal drugs, that’s why mao nang atong gitan-aw karun. Kung makadaog na ang politiko, mura og indebted na ang politiko nila,” saysay pa ni Alcantara.
Kun mapatud-an kun adunay politiko nga nalambigit niini isipon sila sa PDEA 7 nga high-value target (HVT) tungod kay makatampo sila pagpakatap sa drug trade.
Sa pagkakaron, gitug-an ni Alcantara nga wala pay nadawat ang iyang buhatan kabahin sa maong illegal nga buhat.
Sa laing bahin, gidayeg ni Alcantara ang Dakbayan sa Sugbo gumikan kay nagpadayon kini nga nagkibatok sa illegal nga drugas ilabi na sa pagpatuman sa Barangay Drug Clearing Program kun diin 33 sa 80 ka mga barangay sa syudad ang gikonsiderar nga drug cleared.
Ang mga drug cleared nga mga barangay gilangkuban kini sa San Jose, Cambinocot, Kasambagan, Zapatera, Budlaan, Kamagayan, Agsungot, Binaliw, Tabunan, Punta Princesa, Kalubihan, Adlaon, Basak Pardo, Buot Taup, Kinasang-an, Lusaran, San Antonio, Pamutan, Parian, Sudlon 1, Sudlon 2, Toong, Sto. Niño, Sapangdaku, Sinsin, Bacayan, Guba, Malubog, Pit-os, Paril, Mabini, Lusaran, ug Taptap. (BANAT NEWS)