CEBU, Philippines — Moabot ngadto sa 15 ka panimalay ang apektado sa sunog nga niulbo sa may Sitio Camansi San Roque, Barangay Mambaling, Sabado sa kaadlawon.
Ang sunog giingong nagsugod sa panimalay ni Lourdes Estella nga giokupahan ni Steve Medina.
Ang alarma nadawat sa kabomberohan alas 3:38 sa hapon, diin giisa sa 1st alarm alas 3:45; 2nd alarm alas 4:03 ; fire under control alas 4:54 ug hingpit nga na fireout alas 5:17.
Gibana-bana nga moabot P1.5 milyon ang danyos sa sunog nga niapektar og 15 ka panimalay diin 12 ang totally burned ug tulo ang nakan-an sa kalayo.
Walay gikataho nga nakalas apan adunay usa ang naangol human nakaangkon ug 2nd degree burn sa iyang lawas ug naa sa pribado nga tambalanan karon.
Ang kabomberohan pinangulohan sa imbestigador nga si Fire Officer 3 Fulbert Navarro, padayon pang nagsusi sa hinungdan sa maong sunog.
Base sa talaan sa Department of Social Welfare and Services adunay 15 ka panimalay ang apektado diin 24 ka pamilya o 149 ka individuals ang apektado sa sunog, sumala pa ni Portia Basmayor.
Ang kagamhanan nihatag na og inisyal nga ayuda sama sa pack meals sulod sa tulo ka adlaw samtang gipahimutang ang mga nasunogan kasamtangan sa barangay hall sa Mambaling.
Si Kapitan Seller Salvador miawhag sa Mambalinganon mga magmatngon sa kanunay aron malikay sa sunog nga motumaw. – IBM BANAT NEWS