CEBU, Philippines — Usa ka 12-anyos nga tinun-an sa grade 7 ang gikatahong nagpabuto og armas sa sulod sa classroom niini sa usa sa mga tunghaan sa Barangay Daro, Dumaguete City, Probinsya sa Negros Oriental kagahapon sa udto.
Nagkanayon si Police Major Fortunato Villafuerte, Deputy Chief sa Dumaguete City Police dunay nitawag kanila nga nagpahibalong dunay nagpabuto og armas sa maong eskuylahan ug sa ilang pagsusi, nasuta nga tinun-an ang nihimo niini. Kausa nakapabuto ang bata nga gipuntariya sa bintana, hinoon sigon sa kapulisan nga wala'y naigo sa maong panghitabo.
"Sumala sa atong initial nga investigation together sa atoang social worker diri sa Dumaguete City kato kuno nga murag iyahang gikuha sa ra pud ba sa pamilya ra pud siguro nila, mao ‘to murag iyang gidala-dala mao ‘to nga nakapabuto," sigon ni Villafuerte. Nagpadayon pa ang imbestigasyon nga gihimo sa mga social worker.
Gisusi nila karon ang kalibre .45 nga pistola nga nakuha gikan sa bata diha sa Firearms and Explosives Office kung kinsa gyuy tag-iya niini.
Aron dili na masubli pa ang nahitabo ang kapulisan sa dakbayan sa Dumaguete girekomendar nila nga inspeksyonon ang mga bag sa mga bata ug mga ginikanan ini og sud sa klase. - IBM BANAT NEWS