CEBU, Philippines — Lima ka e-bike drivers ug usa ka welder ang nadakpan sa kapulisan sa Mambaling Police Station human nagpaaway og kaka nga dunay pusta nga kwarta sa managlahi nga dapit sa Barangay Mambaling, sa Dakbayan sa Sugbu.
Unang nadakpan sa may C. Padilla Street sila si alyas Alvin, 38 anyos, e-bike driver taga Sitio Avocado; alyas Wilbert, 32 anyos, e-bike driver ug molopyo sa Sitio Puntod Alaska ug alyas Roy, 43 anyos, residente sa Sitio Puntod Alaska.
Nakuhaan ang mga dinakpan og duha ka box nga dunay sulod 14 ka mga kaka, usa ka improvised stick nga gigamit alang sa sangka sa kaka ug kwarta nga P300 isip pusta.
Dayon sa Sitio Ibabao, Barangay Mambaling laing tulo sab ka tawo ang nasikoo tungod gihapon sa kaka. Ang mga nadakpan mao sila si alyas Janus, 37, welder, taga Sitio Larima; alyas Kyle, 22 anyos, e-bike driver ug residente sa Sitio Puntod Alaska ug alyas Jim, 32, e-bike driver taga Sitio Puntod Alaska. Nakuhaan sab sila og box nga dunay sulod 13 ka buok sulod nga kaka ug uban pa. Kasong kalapasan sa Presidential Decree 1602 kun illegal gambling ang ipasaka batok sa mga suspetsado. -- IBM BANAT NEWS