CEBU, Philippines — Ordinaryong inspeksyon, niresulta sa pagkadiskubre sa 38 ka gidudahang undocumented Chinese nationals nga gidudahan sab nga nalambigit sa pagpadagan aning gi-ban nga Philippine Offshore Gaming Operations (POGO) sa usa ka resort sa Barangay Saavedra, sa Lungsod sa Moalboal niadtong Miyerkules sa hapon.
Si Mayor Inocentes Cabaron mitug-an sa mga sakop sa media nga ang Bureau of Fire Protection ang unang nakadiskubre sa mga Chinese nationals sa suds a Happy Bear Resort nga ilaha untang himoan og fire safety inspection.
Kini tungod kay dihang nasakpan ang POGO sa Lapu-Lapu City nipagawas siya og kamandoan sa tanang barangay kapitan nga monitoron gyud ang mga resorts ug mga langyaw sa ilang lugar.
Si Cabaron nagkanayon nga adunay mihatag kanila og impormasyon nga ang maong establisemento mi-requrest pagpataud og high-speed nga WiFi ug gipahimoan kini niya og fire safety inspection sa BFP.
“Naay naghatag namo’g info nga kaning Happy Bear, nag request ni sila og high speed wifi… Usa na sa requirements nga mag-establish og POGO activities bitaw. Kay nag-discuss mi ani sa akong chief of police gipa-locate namo ang Happy Bear..” matud ni Cabaron atol sa phone interview sa mga sakop sa media kagahapon.
“Unya pag-adto sa Bureau of Fire nakit-an nila nga daghan ang Chinese, mao na nanawag sila sa taga police ang taga BFP kay beyond the rules naman ang ... so niadto ang police, nag conduct og... dili ingon nga raid or unsa, nag conduct og sila og (proper) identification ..” dugang pagpasabot sa mayor.
Tungod niini, gihimo dayon ang joint inspection nga gilangkuban sa Office of the Building Official, Municipal Peace and Order Council, Moalboal Police Station ug Moalboal BFP ug gisusi ilang mga dokumento.
Si Police Captain Brigido Paca, hepe sa Moalboal Police Station sa pagka karon ilaha lang usa gi-hold ang mga langyaw aron sa pagpangita sa ilang mga dokumento kay ang ilaha rang kusinero nga Chinese ang nakapresentar og dokumento.
Sigon ni Police Lieutenant Colonel Gerard Ace Pelare, tigpamaba ni Police Regional Office (PRO)-7 Director Brigadier General Anthony Aberin nga inspeksyon lang gyud ang tumong pag-anha sa BFP adtong tungora.
Gawas sa 38 ka undocumented Chinese nationals nakita sab ang 34 ka computer sets, upat ka laptops ug 200 ka buok cellular phones ingon man unom ka mga sakyanan nga nakapasamot sa pagduda ni Paca.
Nakig-alayon na karon ang kapulisan sa Bureau of Immigration, Department of Justice, Criminal Investigation and Detection Unit ingon man Regional Anti-Cybercrime Unit-7 aron pagsusi niining tanan.
“They have exclusively rented this resort actually dili gyud siya matawag nato nga high-end resort sa gawas mura og dili magduda or mag suspect nga naay mga unusual activities sa sulod kini nga resort is located 7-kilometers more or less from the highway so we think that this was purposely chosen para ma avoid ang detection,” sigon ni Pelare.
Gikataho nga nagsugod og abang ang maong mga Chinese nationals niadtong Septiyembre 24. Gituohan nga gikan ni sila og laing lugar ug nibalhin lang sa Moalboal.
Wala gisalikway sa kapulisan ang posibilidad nga kauban ni sila niadtong 169 ka Chinese, Malaysians, ug Indonesians nga nagtrabaho sa POGO sa usa ka resort nga gironda sab diha sa Barangay Agus, dakbayan sa Lapu-Lapu sa katapusang bahin sa bulan sa Agosto ning tuiga.
Naglisod karon ang kapolisan pakigestorya sa mga Chinese nationals sanglit dili makamaong mo-English. Sutaon pa kun sila biktima sab sa human trafficking.
Samtang nailhan na sa kapulisan ang tag-iya sa resort nga magtiayon, ang bana usa ka Caucasian samtang Pilipina ang asawa. Sutaon pa kun duna ba silay kalambigitan sa maong gipanghimo sa mga Chinese. — IBM BANAT NEWS