CEBU, Philippines — Gibutang karon sa Regional Holding Unit sa Police Regional Office(PRO)-7 ang hepe sa Police Station 4 sa Lapu-Lapu City Police Office ingon man ang duha niya ka polis nga gialegar nga nangulata sa 20-anyos nga criminology student kay gipasanginlan nga maoy nangawat sa balay nga siya maoy caretaker.
Nagkanayon si Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga kabahin kini sa proseso ang pagrelibo samtang gihimo ang imbestigasyon aron di sila makapanghilabot sa himuong imbestigasyon.
Matud ni Pelare klaro ang baruganan Brigadier General Anthony Aberin nga dili duphan ang sayop nga binuhatan sa iyang mga sakop.
"We will never condone any deviation from the police operational procedures ug naa man gani tay mapamatud-an nga ni-violate sa police operational procedure in the conduct of police operation, in the conduct of investigation as in this case then we will file the necessary charges," sigon ni Pelare. Hinoon, si Pelare miingon nga hatagan og oportunidad ang mga nalambigit nga police nga makapadayag sa ilang habig isip kabahin sa due process.
Subling nagpahinumdom si Aberin sa kapulisan nga sa tanang police operations i-obserbar gyud ang basics, mosunod sa police operational procedure aron malikayan ang problema.Kahinumdoman nga ang maong batan-on mipasangil nga samtang kini, iyang apohan u gang tagiya sa balay nga gikawatan nagpa-blotter, siya naman hinuoy gipaubos sa interogasyon sa maong duha ka polis.
Matud pa niini, gipusposan siya og baseball bat, gibunal-bunalan og arnis, gisagpa ug gipakuryentihan sa duha aron ipaangkon nga siya maoy nikawat sa bisekleta ug chainsaw. Giingong gipaubos sab siya sa drug test ug giingon nga napositibo siya paggamit og drugas nga kusganon niyang gihimakak. Ang batan-on 9-anyos pa nagsugod og kuyog sa apohan isip hardenero sa tagiya sa maong gikawatang panimalay. — IBM BANAT NEWS