CEBU, Philippines — Tulo ka adlaw ang gitakda sa konseho sa Dakbayan sa Sugbo nga pagpahigayon sa budget hearing aron pagtuki sa Supplemental Budget-3 nga mahitabo karong Oktubre 22, 24, ug 25, 2024.
Human nanumpa si Mayor Raymond Alvin Garcia, iyang gi-awhag ang konseho nga paspasan ang deliberasyon sa SB-3 aron maapbruhan na karong buwana og dili na masubli ang nahitabo kaniadto nga nalangay sa pagdawat ang mga empleyado sa ilang tinuig nga bonus tungod kay dugay maaprobahan sa konseho ang supplemental budget.
Tukion sa konseho ang lakip sa SB-3 ang unang hugna sa salary adjustments sa mga empleyado sa Cebu City Hall ug ang Christmas bonus sa mga regular, casual, ug job order nga mga emplyado, ug sa mga honorarium-based nga mga kawani sa barangay.
Napanglantawan nga mahatag na sa unang semana pa lang sa Disyembre niining tuiga ang bonus sa mga empleyado kon maaprobahan lang gyud sa konseho ang supplemental budget. Kapin sa P300 milyones ang gisugyot nga budget ni Mayor Garcia alang sa SB-3.
Suma pa ni Garcia nga kinahanglan na sila mosumiter sa budget para sa tuig 2025 karong October 18, 2024.
Motambong sa budget hearing ang Local Finance Committee, City Administrator Kristine Batucan, mga opisyal sa City Budget Office, City Accounting Office, Human Resources Development Office, Association of Barangay Councils, ug mga taga-Barangay Affairs Office. — MEL BANAT NEWS