CEBU, Philippines — Giguba sa Kagamhanan sa Dakbayan sa Sugbo pinaagi sa Task Force Gubat sa Baha ang kural sa Cebu Port Authority (CPA) sa Pier 2 aron paghawan sa bukana sa Estero de Parian diin ang tubig niini molahos na ngadto sa dagat.
Tumong sa pagguba mao nga malimpyohan ang ilawom sa imburnal sa CPA aron nga moderetso na ang pagdagayday sa tubig sa sapa paingon sa dagat.
Ug usa kini sa mga makasulbad sa problema sa baha sa siyudad.
Ang wall-breaking ceremony gipangulohan ni Mayor Raymond Alvin Garcia ug CPA General Manager Francisco Comendador III kagahapon.
Gitambongan usab kini sa Department of Public Works and Highway (DPWH)-7 Maintenance Division Head nga si Jun dela Cruz, Konsehal Jerry Guardo, pangulo sa Task Force Gubat sa Baha Melquiades Feliciano, Task Force North River Commander Aderson Comar ug Barangay Kapitan sa San Roque nga si Virgie Abenoja.
Ang Estero de Parian giila nga usa ka dakong hinungdan sa pagbaha tungod kay mag-backflow ang tubig niini ilabi na sa panahon kon kusog ang pag-ulan ug magbara ang drainage system duol sa CPA.
Nasuta nga ang paghawan sa lugar mao ang makapamenos sa pagbaha pinaagi sa pagsiguro sa hapsay nga pagdagayday sa tubig ngadto sa dagat.
Matud ni Mayor Garcia nga ang pagguba sa kural maisip na nga kadaogan sa gubat sa baha. — BDB BANAT NEWS