CEBU, Philippines — Pormal na nga gipaila-ila ang Team Liberate Cebu nga gipangulohan ni Cebu City Mayor Michael Rama aron pagpadayag pag-usab sa ilang suporta sa Partido Demokratiko Pilipino (PDP). Niining ulahi lang, ang Ombuds niluwat og kamandoan nga dismissal ug perpetual disqualification batok kang Rama.
Kagahapon nagtapok diha sa Casino Español ang nagkalain-laing personalidad nga bag-o lang niduso sa ilang certificate of candidacy (COC) nga gikan sa lain-laing dapit sa Probinsiya sa Sugbo, silingang dakbayan, ug sa Bohol aron opisyal nga ipahibalo ang ilang alyansa ubos sa PDP.
Lakip sa nitambong mao sila si Cebu Provincial Governor Aspirant Pamela Bariquatro ug Lapu-Lapu City mayoral aspirant Paz Radaza ug uban pa.
Sa press conference human sa programa gipasabot ni Rama nga ang TLC natawo pinaagi sa iyang inisyatibo isip bise presidente sa Visayas.
Matud ni Rama nga gitugotan siya sa pag-isyu og certificate of nomination and acceptance (CONA) alang sa tibuok Isla sa Sugbo ug Bohol diin iyang nasusi nga aduna pay pipila ka mga sakop nga nahabilin ubos sa PDP.
Si Rama nagkanayon nga dihang nanginlabot sa Dakbayan sa Sugbo ang gobernador sa Probinsiya sa Sugbo hinungdan nga nitumaw ang maong grupo.
Matud usab ni Rama nga ang pag-umol sa TLC niagi kini og pito ka tigom nga gilangkuban sa mga diverse nga personalidad gikan sa lain-laing lugar.
Gihisgutan usab niya nga nanghinaot siya nga makaapil sa ilang team ang mga Durano sa 5th district.
Gibutyag ni Rama nga ubos sa ilang pag-endorso ni Bariquatro ilang ipasiugda ang inclusivity.
Si Rama nagdumili sa pagdetalye kon ang TLC usa ka direktang oposisyon sa One Cebu Party nga gipangulohan ni Gobernador Gwendolyn Garcia ug nagkanayon nga siya ang nagmugna sa termino nga “One Cebu Island”.
Dugang ni Rama nga nitumaw kini dihang nangayo siya og pagtugot ni kanhi mayor Edgardo Labella aron masulbad ang problema sa COVID-19 pandemic. —BDB BANAT NEWS