CEBU, Philippines — Nakaangkong og samad dinunggaban sa ilok ang usa ka habal-habal driver human kini dunggaba sa kauban usab niining drayber sa habal-habal niadtong Martes sa gabii diha sa Barangay Cotcot, Lungsod sa Liloan.
Si Police Major Charlie Santiago, hepe sa Liloan Police Station nagkanayon nga ang 43-anyos nga biktima nag-sideline kini og pautang og kwarta ngadto sa mga kauban niining drayber sa habal-habal
Base sa imbestigasyon sa kapolisan nga naningil ang biktima sa suspetsado kinsa nakautang kaniya apan nasuko kini nga niresulta sa ilang panaglalis.
Ug taliwala sa mainiton nilang panaglalis nikuha og kutsilyo ang suspetsado ug dayong dunggab ngadto sa ilok sa biktima.
Ang suspetsado daling nisibat human niini sa pagpanunggab samtang ang biktima kinsa nagsakay usab sa iyang motorsiklo ang daling nidangop sa tambalanan ug nitaho ngadto sa kapolisan.
Ang kapolisan padayon pa karon sa ilang gipahigyon og hot pursuit operation batok sa suspetsado. — BDB BANAT NEWS