Gwen ug Pamela magsakbang

CEBU, Philippines — Pormal na nga miduso sa iyang certificate of candidacy (COC) si incumbent Governor Gwendolyn Garcia ngadto sa Office of the Provincial Election Supervisor (OPES), kagahapon sa buntag, Oktubre 8.

Si Garcia nga maoy standard bearer sa One Cebu, gikuyogan sa iyang mga anak ug mga membro sa partido sa iyang pagduso sa COC.

Matud niya nilansar og balik alang sa iyang ika-unom nga termino ubos lang sa One Cebu, wala siyay gidala nga partido sa nasyonal.

Apan iyang gisubli nga ang ilang lokal nga partido tibook ang suporta sa administrasyon ni Presidente Ferdinand Marcos Jr. Si Garcia nagkanayon daghan pa ang “unfinished business” o proyekto nga iyang gusto ipatuman sa iyang ikaunom nga termino.

 Ang runningmate ni Garcia mao si bokal Glenn Anthony Soco sa sixto distrito kinsa niduso niini usa ka oras ayha pa manirado ang Comelec sa alas-5 sa hapon.

Karon maoy ikatulong pagdagan ni Soco pagka bise gobernador. Una niadtong 2010 sa dihang runningmate silang Garcia, apan napildi siya niadtong higayona. Milansar siya og balik pagka bise gobernador sa tuig 2013 isip independente apan napakyas gihapon. Atbangan sa pagka gobernador si Garcia ni Pamela Baricuatro kanhi secretary general sa Partido Federal ng Pilipinas  PFP - Cebu Province.

Siya gikuyogan sa nasuspensong mayor sa dakbayan sa Sugbo nga si Mike Rama ug suspendido sab nga city administrator Atty. Collin Rosell, uban sa ilang supporters.

Gawas ni Baricuatro, usa ka retiradong seaman sab ang nidagan pagka-gobernador nga mao si Valeriano Gingco, 67, taga Brgy. Baring, Carmen.

Sa pikas bahin, nidagan isip independenteng kandidato pagka-bise gobernador si kanhi interior secretary Joselito Ruiz.

Samtang si Bise Gobernador Hilario Davide III miduso pud sa iyang COC apan isip usa ka kongresista sa segundo distrito.

 Giangkon pud ni Davide nga gihangyo sya ni Garcia nga mahimong runningmate niini ug nagpasalamat siya sa pagsalig niini apan iya kining gipasabot bahin sa iyang desisyon nga mag kongresista sa distrito.

Sa pikas bahin, si Pablo John “PJ” Garcia miatras sa iyang pagpasubli isip kongresista sa tersero distrito apan gihulipan siya sa iyang asawa nga si Karen Hope Flores-Garcia nga niduso na sa iyang COC kagahapon.

Matud pa ni PJ gusto niyang palamboon ang iyang kinaadman sa pamalaod ug ang dugay na niyang pangandoy pagsuwat og libro.

Nakaduso na sab sa ilang kandidatora ang kompletong slate sa Sulbong Toledo pinanguluhan ni Konsehal nga karon mayoralty candidate Ceasar Geronimo “Ian” Zambo uban ni Konsehal Arlene “Dydee” Espinosa-Zambo.

Gipili ni Zambo ang pagduso sa COC kagahapon kay dungan kini sa birthday sa iyang asawa human sila motambong tanan og misa sa San Juan de Sahagun Church.

Sa pikas bahin, niduso sab sa iyang certificate of candidacy ang last termer nga si Borbon Vice Mayor Roy Melgo diha sa Comelec karong adlawa. Si Melgo modagan pagka mayor sa lungsod nga walay kaubang mga konsehal. Si Melgo nidagan ubos sa National Unity Party.

Samtang bagang duot sa mga supporters nila ni Mayor Gerald Anthony "Samsam" Gullas ang naghugop sa Talisay City Hall Grounds agi sa pagpakita sa ilang suporta sa Team Alayon sa pagduso sa ilang Certificate of Candidate.

Matud pa ni Gullas, kung hatagan siya ug kahigayonan mao na kini ang iyang katapusan nga termino sa pagserbisyo isip mayor sa siyudad ug ipadayon niya ang mga nasugdan nga mga proyekto. Si Atty. Richleigh Consulta sa Dakbayan sa Talisay nibutyag nga gawas sa kampo ni Gullas, usa pa gihapon ang nauna nga niduso sa ilang COC pagka konsehal nga mao ang 70-anyos nga si Dennis Basillote.

Ang kataposang niduso og COC sa Comelec sa probinsya kagahapon mao si incumbent Danao City Mayor Thomas "Mix" Durano kinsa moatbang kang  Fifth District Representative Duke Frasco.— Gabriel Bonjoc , Kristin de Dios (BANAT NEWS)