CEBU, Philippines — Lima ang magtigi pagka-mayor sa Dakbayan sa Sugbo sa umaabot nga piniliay sa tuig 2025 basi sa naduso nga certificate of candidacy gikan sa pagsugod, Oktobre 1 hangtud sa katapusang adlaw kagahapon, Oktobre 8 ,matud pa sa Commission on Election.
Kagahapon sa buntag, Martes, miduso sa ilang COC ang mga kandidato sa Partido Federal ng Pilipinas nga gilangkoban sa Kusog-Panaghiusa Alliance pinangulohan ni acting Mayor Raymond Alvin Garcia nga magpapili isip mayor sa siyudad.
Kauban niya ang iyang runningmate nga si Atty. Joey Daluz ang kanhi chairman sa MCWD nga miduso sa iyang COC pagka bise mayor. Bagang duot sa mga supporters ang niduyog kanila. Si Kongresista Edu Rama kinsa sakop sa Barug Team Rama dalhon sab sa partido ni Garcia para sa South District. Bugtong ang North District lang ang ilang gibutangan nga mao si Kongresista Cutie Del Mar.
Ala-una sa hapon nagpanon usab ang mga sakop sa Bando Osmeña Pundok Kauswagan (BOPK) kauban ang ilang mga supporters sa buhatan sa Comelec.
Miduso sa iyang COC ang ilang standard bearer pagka mayor nga si Konsehal Nestor Archival ug ang iyang bise mayor mao si kanhi mayor Tomas Osmenña. Ang grupo gikuyogan sa ilang mga pamilya ug supporters. Apil sa miduso sa ilang COC ang mga magpapili pagka konsehal ug kongresista sa North ug South District.
Una nang nakaduso sa ilang COCs silang suspended mayor Michael Rama ug kanhi PDEA-7 director Yogi Ruiz ug usa ka Julito Co. (BANAT NEWS)