Tag-iya sa warehouse sa mga sigarilyo nga gironda sutaon

CEBU, Philippines — Nag-request ang Criminal Investigation and Detection Group (CIDG) Mandaue City Field Unit sa Business Permit and Licensing Office sa Dakbayan sa Mandaue aron masuta kinsay niabang sa FMC Warehouse nga ilang gironda ug nasakmitan og P100 milyones nga balor sa ilegal nga mga sigarilyo niadtong Sabado.

Matud ni Police Captain Nigel Sanoy, hepe sa CIDG Mandaue City Field Unit nga kon mailhan na ang nag-abang sa warehouse mao kini ang pasakaan og kaso sa Bureau of Internal Revenue (BIR) og kalapasan sa Section 263 sa National Revenue Code of 1987.    

Niadtong Lunes nahuman ang BIR ug kapolisan sa pag-inventory sa mga sigarilyo apil ang raw materials ug makina niini nga ang tanan niabot ngadto sa P100 milyones.

Giingong ang maong ilegal nga buhatanan og sigarilyo mo-supply kini og sigarilyo sa tibuok Pilipinas.

"Diri lang sila nagbase kay strategic man gud ang Cebu, pwede sila mo Region 6, pwede ka mo Region 8, Mindanao sad then Luzon pero via north mao bitaw didto sila gabutang saona katong among gisundan sa north kay naa may barko padong og Region 5, Masbate and Batangas", butyag ni Sanoy.

Gumikan sa maong ilegal nga binuhatan dako og alkanse ang panudlanan sa gobiyerno tungod kay wala man moagi og tax.

Nasayran nga napulo ka buwan nga gi-monitor ang ilegal nga kalihokan sa maong bodega.

Giingong mao kina ang nag-supply og mga ilegal nga sigarilyo sa mga tindahan nga una nang gironda sa CIDG Mandaue City Field Unit.

Gawas niini, aduna pay laing gipanid-an ang CIDG nga mga nagpalusot og naghimo og ilegal nga sigarilyo sa Central Visayas.

Nunot niini, gipatak-opan sa buhatan sa Business Permit and Licensing Office (BPLO) ang nahisgutang bodega nga nahimutang sa Barangay Looc, Siyudad sa Mandaue.  Si Atty. August Lizer Malate, pangulo sa BPLO nagkanayon nga human nila madawat ang taho sa gihimong operasyon sa CIDG nipahigayon usab sila og pakisusi.

Ug nasuta nila ang ilegal nga operasyon tungod kay wala kini business permit ang maong establisamento. (BANAT NEWS)