Kataposang adlaw sa filing sa COC malinawon–CCPO

CEBU, Philippines — Ang Cebu City Police Office (CCPO) nihulagway nga hapsay ug malinawon ang kataposang adlaw sa pagduso og certificate of candidacy kagahapon alang sa midterm election.

Sayo pa, gibutyag sa CCPO nga mas doble ang pwersa sa kapolisan nga gipakatap sa buhatan sa Commission on Elections Cebu City north ug south district aron masiguro nga walay mga kakulian ug kon aduna man gani mahitabo marespondehan dayon og polis.  Matud ni Police Lieutenant Colonel Maria Theresa Macatangay, deputy city director for operations ug tigpamaba sa CCPO nga human sa filing sa COC adunay mga meeting nga himuon tali sa mga ahensiya sa gobiyerno kalabot sa umaabot nga piniliay.

"We will be outlining other activities in preparation for the upcoming May 12 election next year so those are the things we expect to happen after the filing of COC", padayag ni Macatangay.  Gipadayag sa kapolisan nga dinhi sa Cebu City walay election related incidents ug gidayeg nila ang mga taga Cebu City sa kooperasyon nga gihatag aron dili mabalda ang kahapsay ug kalinaw sa siyudad.

Gilaoman nga mohimo og inventory ang CCPO sa ilang mga personnel aron masuta kon aduna ba kini mga kabanay nga modagan sa sunod tuig nga eleksiyon ilabi na sa dapit diin sila nadestino aron ibalhin una kini og assignment. (BANAT NEWS)