Duha ka carnapper sikop sa hot pursuit

CEBU, Philippines — Nabalhog sa prisohan ang duha ka suspetsadong carnapper human kini nasikop atol sa gipaghigayong sa hot pursuit operation sa kapolisan kagahapon ug na-recover ang tulo ka motorsiklo nga giingong ilang gidagit diha sa Barangay Poblacion, Dakbayan sa Toledo.

Si Sarah Cris Delica, 30-anyos, minyo, nagpuyo sa Barangay Olango, Lungsod sa Aloguinsan nangayo kini og tabang sa kapolisan human na –carnap ang iyahang motorsiklo.

Ang kapolisan sa Lungsod sa Aloguinsan daling nipahigayon og hot pursuit operation ug pinaagi sa tabang sa komunidad nailhan ug natultolan nila ang mga suspetsado.

Nasikop sa mga polis sila si William Mendoza Linihan, hingkod ang panuigon, residente sa Barangay Poblacion, Dakbayan sa Toledo ug ang kakunsabo niini nga si Albert Gako Flores, Jr., residente sa Barangay Poblacion, Dakbayan sa Toledo.

Na-recover sa kapolisan ang tulo ka motorsiklo nga giingong gi-carnap sa mga suspetsado.

Nasayran nga si Linihan nakombikto kaniadto sa kasong attempted murder sa Regional Trial Court Branch 28, Dakbayan sa Toledo. Ang kapolisan mapasalamaton sa komunidad nga nitabang kanila aron masikop ang mga suspetsado.

Giawhag sa kapolisan ang ubang mga nabiktima sa carnapping nga moduaw sa ilang buhatan.

Kasong kalapasan sa New Anti-Carnapping Act of 2016 ang kasong atubangon sa mga suspetsado. (BANAT NEWS)