Karsada sa manipis temporaryo nga paagian

CEBU, Philippines — Gipahibawo ni Jonathan Tumulak, pangu sa City of Talisay-Traffic Operation Development Authority (CT-TODA) nga temporaryo na nga maagi-an ang karsada sa Manipis, Dakbayan sa Talisay.

Kini human sa nahitabong pagdahili sa yuta sa maong dapit nga mitabon sa daku nga bahin sa karsada.

Apan giklaro ni Tumulak nga dili pa gyud kini madali tungod sa kalapad sa nahitabo nga landslides niadtong miaging semana.

Ang sistema nga ilang gihimo karon mao nga kun maghakot man og yuta ug bato ila usa nga pahunongon ang mga sakyanan ug ila ra usab nga paagion kun wala pay truck nga mohakot sa mga bato og yuta.

Dugang ni Tumulak nga kun molihok nasab ang yuta sa bukid ila gyud dayon nga isira ang karsada aron walay madisgrasya.

Sa nasayran nahitabo ang pagdahili sa yuta niadtong miaging semana human sa kusog nga uwan sa dapit.

Samtang dul-an 600 ka pamilya sa Barangay Manipis, nga naapektuhan sa landslide ang nakadawat na sa ilang tabang pinansiyal gikan sa City Social Welfare and Development Office (CSWDO) kagahapon.

Matag pamilya nakadawat og P1,000 nga hinabang nga personal nga gihatag ni Talisay City Mayor Gerald Anthony Gullas.

Ang mga pamilya nga nakadawat gikan sa purok Bamboo, Cacao, Banana, Manga, Caimito, Tugas, San Francisco, Gumamela, ug purok Santan.

Samtang si Barangay Kapitan Antonio Jaberina mapasalamaton kang Gullas ug sa CSWDO sa gihatag nga ayuda.

Gipahibawo usab sa kapitan nga temporary nga maagian ang karsada human mahawani ang pikas nga bahin apan makigtigum pa sila uban sa Department of Public Works and Highways (DPWH) tungod kay kinahanglan gyud sirad-an ang dalan. (BANAT NEWS)