CEBU, Philippines — Gianunsiyo na sa Civil Service Commission (CSC) ang iskedyul sa Civil Service Examinations through Pen and Paper Test (PPT) sa sunod tuig, 2025.
Alang sa eksaminasyon sa Career Service Examination for Foreign Service Officer (CSE-FSO), ipahigayon kini sa Enero 26, 2025 ug ang application period nagsugod na niadtong Septiyembre 23, 2024 hangtud Septiyembre 30, 2024 sa DFA-BFSE Secretariat samtang hangtud Oktubre 30, 2024 sa DFA Satellite and Consular Offices; DFA Foreign Service Posts.
Para sa CSE Professional ug Sub Professional nga lebel, ang eksaminasyon gi-eskedyul sa duha ka hugna diin ang unang hugna himoon sa Marso 2, 2025, ug ang application period magsugod sa Nobiyembre 19, 2024 hangtud sa Enero 3, 2025. Samtang ang ikaduhang hugna gikatakda sa Agosto 10, 2025, diin ang application period sa Mayo 12, 2025 ngadto sa Hunyo 11, 2025.
Samtang ang eksaminasyon sa Basic Competency on Local Treasury Examination (BCLTE) ipahigayon sa Hunyo 1, 2025. Ang application period niini gikan sa Marso 3, 2025 hangtud Abril 2, 2025 ug ipagawas ang resulta niini sa Hulyo 13, 2025.
Dugang pa, ang CSC mag-isyu ug advisory sa eksaminasyon mga duha (2) ka semana sa dili pa ang adlaw sa eksaminasyon mahitungod sa importanteng mga pahinumdom ug uban pang mga update/kauswagan nga may kalabotan sa eksaminasyon. Ang advisory i-post usab sa CSC Website. (BANAT NEWS)