CEBU, Philippines — Patay ang usa ka 21-anyos nga lalake human kini giulo sa pagpusil sa wala pa mailhing mamumuno samtang kini nagduwa og billiards diha sa Sitio Lawid, Barangay Pasil, siyudad sa Sugbo niadtong Sabado sa gabii, Oktubre 5, 2024.
Ang biktima mao si Jun Ryan Concha Ramas, 21, residente sa Sitio Lawis, Barangay Pasil ning siyudad.
Sa inisyal nga imbestigasyon sa Sawang Calero Police Station 6 sa Cebu City Police Office (CCPO) ang biktima ug ig-agaw niini nagduwa og billiards dihang ang wala mailhing lalaki nga nagsul-ob og itom nga jacket ug itom nga shorts miduol sa biktima.
Way daghang estorya, kalit niining gipusil kaduha ang biktima hinungdan sa pagkahagba niini. Human sa hitabo, yanong nilakaw palayo ang mamumuno.
Sigon pa ni Police Captain Jay-R Palcon, hepe sa Sawang Calero Police Station nga usa ka drug personality ang biktima ug giingong nakadispalko kini og halin sa illegal nga drugas.
"Yes, isa ‘yan sa tinututukan namin na leads, based sa text messages na malaki ang kulang niya sa amo niya sa drugs," sigon ni Palcon. — /IBM (BANAT NEWS)