Yogi Ruiz mokandidato pagka mayor sa siyudad sa Sugbo

CEBU, Philippines — Duha ka adlaw sa dili pa mahuman ang pag-file sa Certificate of Candidacy (COC), usa sa Cebu City mayoral aspirant nga si kanhi Custom Commissioner Yogi Felimon Ruiz wala gihapon modeklarar sa iyang running mate sa 2025 midterm elections bisan pa man sa pagpahigayon og proclamation rally.

Niadtong Sabado, Oktubre 5, 2024, mihimo ang kampo ni Ruiz og proclamation rally aron opisyal nga ipahibalo ang iyang tinguha nga modagan pagka mayor sa Cebu City.

Matud pa ni Ruiz nga ang mga tawo nga nagtapok sa maong kalihukan maoy timailhan sa usa ka bahin nga nangita og "kausaban". Pasabot niini, ilang gipresentar ang ilang kaugalingon isip "mas maayo nga alternatibo".

Gipresentar usab ni Ruiz ang iyang councilorial slate nga alang kaniya mga indibidwal nga adunay "impeccable character".

Alang sa pagka konsehal sa Cebu City South, gipaila ni Ruiz silang; Arlene Salahuddin, Emmanuel Maranga, ex-PBA player ug Comedy Actor, Bonel Balingit, Niceforo Iroy, Lawyer Renil Oliva, ug Omar Kintanar.

Alang sa North District, gipaila usab ni Ruiz si Clarissa Otadoy sa councilor race.

Gituldokan usab ni Ruiz ang mga pangagpas nga iyang sagopon si kanhi Cebu City Mayor Tomas Osme?a isip iyang running mate. Siya miingon nga dili siya mupugos sa pagkompleto sa iyang slate.

Sa bahin sa iyang Certificate of Nomination and Acceptance (CONA), si Ruiz niingon nga aduna na siyay giisyu sa iyaha gikan sa orihinal nga partido ni Presidente Ferdinand "Bong-bong" Marcos Jr., ang Kilusang Bag-ong Lipunan.

Gikataho nga si Ruiz, nanumpa isip regional chairman sa partido karon sa presidente, ang Partido Federal ng Pilipinas.

“Naa namay ni insist nga usa ka grupo nga silay maoy standard bearer kuno, so nganong ako man i-insist akong kaugalingon,” dugang pa niya.

Niadtong Sabado, wala pa gideklarar ni Ruiz ang iyang tandem ug ang mga aspirants sa partido alang sa mga puwesto sa kongreso apan dugang pa niya nga kinahanglan niya nga magpaka "realistic".

Bisan pa man sa mga blangko nga position sa ilang slate, si Ruiz niingon nga ang ilang pagdagan sa election dili masukod og kompletong slate kon dili grupo sila sa mga indibidwal nga susama niya og panglantaw para sa siyudad sa Sugbo.

Si Ruiz gikatakdang moduso sa iyang COC karong adlawa lakip na ang iyang slate. — /MEL (BANAT NEWS)