CEBU, Philippines — Ang Department of Health (DOH) nag-awhag sa mga ginikanan ug mga guardians nga andamon ang ilang mga anak aron moapil sa nasudnong Bakuna Eskwela nga pagabuhaton sa mga pampublikong eskwelahan sugod karong adlawa, Lunes.
Si DOH Health Promotion Bureau division chief Dominic Maddumba miingon nga base sa ilang kasinatian bahin sa Bakuna Eskwela sa nangaging katuigan, daghang mga tinun-an ang nakuyapan kay nahadlok nga mabakunahan.
Tungod niini, iyang giawhag ang mga ginikanan ug guardians nga ipasabot sa ilang mga anak ang kaayohan sa pagpabakuna ug ipasalig nga anaa ang mga health care workers ug magtutudlo aron magbantay sa ilang kaluwasan.
Dugang pa niya nga dapat nilang pakan-on ang ilang mga anak una pa moadto sa eskuylahan kay usa sa mga hinungdan nganong makuyapan o bation og kahadlok kay walay sulod ang tiyan.
Tambag usab niya nga susihon kong ang ilang mga anak physically fit ba alang sa pagbakuna. Kadtong adunay hilanat ug nagpakita og mga sintomas sa mga sakit dili lang una pabakunahan.
Ubos sa Bakuna Eskwela, ang mga tinun-an gikan sa Grade 1 hangtod Grade 7 makadawat og libreng bakuna nga moprotekta nila batok sa mga vaccine-preventable diseases (VPD), sama sa measles, rubella, diphtheria, tetanus, ug cervical cancer tungod sa human papillomavirus (HPV) infection.
Kining immunization drive ipahigayon sulod sa duha ka bulan ug pagkahuman sa Oktubre 7 ang mga tinun-an mahimong magpabakuna matag Biyernes.
Si Maddumba miingon nga atol sa adlaw sa pagbakuna kinahanglan dad-on sa mga estudyante ang ilang routine immunization card aron masusi kung nahuman ba nila ang tanan nga mga jabs ug aron malikayan ang paghatag og dugang nga doses.
Samtang mild ra ang epekto sa immunization sama sa ubos nga hilanat ug pagsakit sa lugar nga gi-injection, tambag ni Maddumba nga ireport dayon ang grabe nga mga epekto sa labing duol nga health center o hospital.
Matud ni DOH Secretary Teodoro Herbosa kaniadto dili kini mandatory ug kinahanglan ang pagtugot sa mga ginikanan ug guardian sa mga tinun-an. — /IBM (BANAT NEWS)