CEBU, Philippines — Pangulo sa City of Talisay Traffic Operations Development Authority kon CTTODA Jonathan Tumulak mohangyo sa City Veterinarian sa dakbayan nga pangdakpon ang mga iro nga naglibud-suroy sa Cebu South Coastal Road.
Kini human dunay duha ka lalaki ang nangaangol og grabeng pangos nga nagsakay og motorsiklo tungod kay nakaligis og iro nga nilabang sa Cebu South Coastal Road.
Ang iro base sa nakita sa ‘Huli CAM’ sa CTTODA giingong nilabang ug natapsingan sa usa ka sakyanan hinungdan nga nibalik kini sa agi nga nagtakiang ug nidagan padung sa pikas nga lane ug nibalik na usab sa tunga ug nilabang dungan usab sa nga go signal na ang traffic light. Nakalikay ang ubang motorista apan ang duha ka lalaking sakay sa motor mao gayud ang nakadasmag sa iro hinungdan sa ilang pagkalukapa ug nawalis pa ang ilang mga helmet.
Matud pang Tumulak peligro sa mga motorista kining mga naglatagaw nga mga iro diha sa kadalanan mao nga kinahanglan kining panghipuson.
Si Dr. Maria Christine Dejadena ang Talisay City Vet nibutyag nga sa usa ka buwan dili mominus sa 100 ka mga stray dogs ang ilang ma rescue, apan wala hinuon ibutyag kun asa kini gikan.
Nanawagan siya sa mga pet owners nga mahimong responsable ug dili tugotang maglaruy-laroy ilang mga iro. — /IBM (BANAT NEWS)