CEBU, Philippines — Mga opisyal sa Barangay Manipis, Dakbayan sa Talisay nanawagan og tabang alang sa ilang mga molupyo.
Si Konsehal Emma Cabiluna nibutyag nga daghan sa molupyo nga mga trabahante ang wala na makatrabaho tungod kay dili makalabang human nidahili ang yuta ug mga bato niadtong Miyerkules sa kadlawon ug niali kini sa Manipis-Toledo Road.
Ang mga tawo gidid-an nang moagi diha sa maong dapit ilabi na nga magsige pa og lihok ug pagpangatagak ang mga yuta ug bato sa ibabaw nga bahin sa parte sa bungtod.
Ug giingong posible nga moabot pa hangtud sa sunod semana una kini maagian sa mga biyahedor.
Matud ni Cabiluna nga ang mga residente nga apektado nihangyo og bugas lakip ang panud-an diin ubay-ubay kanila ang wala makatrabaho tungod sa kalayo na sa agianan ug dakoan na sa pamilite ang uban.
Gipadayag ni Cabiluna nga adunay alternatibo nga dalan apan mas layo ug mas mahal ang pamilite diin kinahanglan pa nga moagi sa Dakbayan sa Toledo o diha sa bukid sa Dakbayan sa Sugbo.
Si Cabiluna nihangyo nga malimpiyohan ang dalan sa Sitio Campinsa sa nahisgutang barangay tungod kay adunay daghang moagi sa dapit apan risgo gumikan sa kadangog sa agianan.
Dugang ni Cabiluna nga gipaubos sa modular ang apektadong mga tinun-an sa maong lugar. (BANAT NEWS)