CEBU, Philippines — Ang Commissions on Elections-7 nibutyag nga adunay 304 na ka kandidato ang niduso sa ilang certificate of candidacy (COC) alang sa nagkadaiyang posisyon sa 2025 midterm elections.
Gikan sa Oktubre 1 hangtud sa 3, 2024 adunay 227 ka lalaki ug 77 ka babaye ka kandidato ang natala sa Comelec.
Ubos sa kinatibuk-ang ihap 120 ang kandidato sa Cebu samtang 184 gikan sa Bohol.
Wala na giapil niini ang Siquijor ug Negros Oriental tungod kay anaa na kini sa Region 18 o Negros Island Region (NIR).
Sa lokal nga piniliay, pito ang ni-file alang sa House of Representatives; usa alang sa pagka-gobernador; duha alang sa bise gobernador; 14 alang sa mga Sangguniang Panlalawigan; 31 alang sa mayor; 25 alang sa bise mayor; ug 224 alang sa Sangguniang Panlungsod.
Matud ni Atty. Francisco Pobe, regional director sa Comelec nga ang unang tulo ka adlaw sa pag-file sa mga kandidatura malinawon ug maayo ang dagan.
Gipanglantawan nga modagsa ang mo-file og COC sa kataposang tulog ka adlaw sa filing sa Oktubre 6,7 ug 8 sama sa nangaging mga piniliay. Sa laing bahin, human sa pagbag-o sa mga rehiyon niadtong Hunyo 2024 diin ang Siquijor ug Negros naapil sa bag-ong naporma nga Negros Island Region (NIR) adunay dagkong kausaban sa proseso sa pagparehistro sa mga botante sa Central Visayas.
Sa 2023 Barangay ug Sangguniang Kabataan Elections (BSKE) ang Central Visayas apil pa ang Siquijor ug Negros diin adunay kinatibuk-an nga 7.3 milyones ka rehistradong botante.
Ang Negros Oriental nidugang ug 1.2 milyones ka botante samtang ang Siquijor adunay 107,000 ka botante.
Ug tungod sa ilang pagbalhin sa bag-ong rehiyon nabantayan ang pagkunhod sa mga botante sa Central Visayas ngadto sa 1.3 milyones. Ang Cebu karon adunay 5.9 milyones ka botante ug ang Bohol adunay 1.3 milyones.
Samtang ang Comelec sa Dakbayan sa Talisay nihangyo ngadto sa adunay plano nga magpapili sa piniliay sa sunod tuig nga moduso og sayo sa ilang COC.
Sa laing bahin usab, ang Police Regional Office-7 nipakatap og 3,000 ka PNP personnel diha sa mga buhatan sa Comelec sa tibuok Rehiyon 7. Sila maoy nagbantay sa mga buhatan sa Comelec gikan sa pagsugod sa filing sa COC hangtud matapos kini sa Oktubre 8, 2024. Gabriel C. Bonjoc, Decemay P. Padilla (BANAT NEWS)