Rama, cortes gi-dismiss sa serbisyo

CEBU, Philippines — Migawas ang mga desisyon sa Ombudsman nga silang suspended Cebu City mayor Michael Rama ug Mandaue City suspended mayor Jonas Cortes gipahamtangan og dismissal sa serbisyo nga pinetsahan sa managlahi nga adlaw sa nilabay nga buwan sa Septiyembre 2024.

Si Rama gikatahong nakita nga  guilty sa kasong gisang-at batok kaniya nga nepotismo ug grave misconduct kini base sa gipagawas sa Ombudsman kang Rama nga gipetsahan og September 25, 2024 human sa imbestigasyon sa special panel of investigators sa Anti-Graft Office nga giaprubahan ni Deputy Ombudsman for MOLEO, Jose Balmeo Jr.

Subay niini gipahamtangan si Rama og pagkataktak sa serbisyo nga nagtangag og cancellation of eligibility, forfeiture sa iyang retirement benefits gawas lang sa iyang accrued leave credits.

Gipahamtangan usab siya og perpetual disqualification for reemployment sa government service. Ang kaso nagsukad sa gisang-at nga reklamo nga gi-hire sa City Hall ang duha ka igsuon sa iyang asawa.

Sa pagsuwat ning balita wala pa moluwat og komento ang kampo ni Rama bahin niini, apan sa iyang post sa Facebook, siya nagkanahon nga magpadayun siya sa iyang panerbisyo ug miawhag sa iyang mga supporters ug sa iyang Partido BARUG BagOng Sugbu Team Rama, nga magbugkos ug maghiusa para sa katarong ug kaangayan.

“Let us do so with conviction, firmness, and resoluteness. The time has finally come for us to once again showcase our brand of leadership—a leadership with grounded in service above self….,” pipila ka linya sa iyang post.

“I will tirelessly stand and fight for what each Sugboanon rightfull deserves. Together, we will upholdthe values and principles that define us as Cebuanos,” dugang pa niya.

Si Rama ug ang iyang partido nakaduso na og certificates of candidacies sa Comelec  kagahapon, Huwebes sa buntag isip mayoral aspirant sa dakbayan sa umaabot nga 2025 elections.

Sa pikas bahin, susama usab ang gipahamtang kang Cortes kinsa nakita sab nga guilty sa kasong grave misconduct ug aduna kini penalty nga dismissal sa serbisyo.

Ang reklamo nagsukad sa reklamo sa duha ka mga tawo niadtong Oktobre 17, 2022 may kalabutan sa pagpatrabaho sa circumferential road sa barangay Labogon sa Mandaue City bisan matud pa kulang sa mga permits.

Ang desisyon giluwatan sa Ombudsman niadtong Septiyembre 26, 2024. Si Cortes sa iyang bahin nibutyag nga wala na siya masurpresa sa desisyon sa Ombudsman tungod kay sayod siya nga ang iyang kontra mogamit sa ilang gahum ug koneksyon.

Ang mayor nipadayag nga ilang atubangon tanan hagit ug ilang buhaton tanan legal remedy sa pakigbatuk sa maong battle kay dili na kini iyaha lang apil na ang pagsalig nga gihatag sa mga Mandauehanon ug iyaha kini depensahan.

"Ang Mandaue kanunay’ng nagpabiling usa ka siyudad sa hiniusang pagbangon ug nasayod ko sa akong kasingkasing nga malabang nato kining unos nga malampuson. Naghangyo ako sa inyong padayong pakigbisog ug suporta samtang kita nga magbarog nga lig-on tungod kay ang hustisya ug kamatuoran anaa sa atong kiliran, together we will move forward no matter what," tipik sa mensahe opisyal nga giluwatan ni Cortes. (BANAT NEWS)