Lalaki nakigpinusilay sa polis, nasamdan

CEBU, Philippines — Nasamdan ang usa ka human kini gikatahong nakigpinusilay sa kapolisan diha sa sitio Tabay, Barangay Tunghaan, lungsod sa Minglanilla niadtong Miyerkules sa buntag.

Si Police Lt. Col. Epream Paguyod, hepe sa kapolisan sa Talisay nibutyag nga nituyo sa pagadto sa lugar ang iyang mga sakop aron sa pagsunod sa person of interest sa pagpamusil nga nahitabo sa Barangay Tanke, Dakbayan sa Talisay niadtong Lunes.

Apan sa pag-abot nila sa dapit gisugat sila og pagpamusil ni Jeffrey Monterde, 37 anyos. Walay naigo sa mga sakop sa kapolisan pero sa pagbawos sa operatiba naigo si Jeffrey sa iyang kamot ug tiil apan gikatahong nakaikyas gihapon kini. Nagkanayon si Paguyod nga nihimo sila og hot pursuit operation ug nasikop nila kini sa  Purok Colis, Barangay Candulawan sa Talisay City.

Nakuhaan og usa ka .45  nga pusil ang dinakpan nga adunay usa ka bala ug duha ka pakite nga shabu nga nikantidad og P50 mil.

Ang dinakpan mao ang maguwang ni alyas Tiyan kinsa suspek sa pagpusil sa hepe sa tanod sa Candulawan makaduha ka higayon. Si alyas Tiyan nasikop sab niadtong miaging adlaw.

Sa nasayran, duha nila ka igsuon ang unang nangasikop human nakuhaan og mga armas niadtong miaging buwan.