Oliva giawhag sa nagkadaiyang sektor nga mokandidato

CEBU, Philippines — Naghugop sa buhatan ni Mandaue City Treasurer Atty.  Regal Oliva ang napulo ka sektor ug kusganon kining niawhag kang Oliva nga mokandidato sa pagka-kongresista sa 2025 midterm election. Si Reglyn Bihag sa LGBTQ plus sector nagkanayon nga nadasig sila  sa pag-awhag kang Oliva nga mokandidato sa pagka-kongresista human sa gihimo  nilang signature campaign ug nakakuha sila og 56,000 ka pirma gikan sa mga  botante sa Siyudad sa  Mandaue nga nagpadayag sa ilang pagsuporta sa kandidatura ni Oliva.

Ang signature campaign ilang gisugdan sa pagpahigayon pinaagi sa pagsuroy sa kabarangayan niadtong bulan sa Agosto niining tuiga ug ilang nahipos ang maong gidaghanon sa nipirma nga nisuporta kang Oliva. Si Alice Cabatingan sa women sector nagkanayon nga haom kang Oliva nga mahimong kongresista sa Lone District tungod kay usa kini ka abogado.

Sa iyang bahin, si Oliva nagpasalamat sa nagkadaiyang sektor sa siyudad ug matud niini nga mokonsulta pa siya sa iyang pamilya sa dili pa siya mopakanaog sa iyang hukom sa pagsulod sa politika. (BANAT NEWS)