CEBU, Philippines — Nihimo og marijuana eradication ang mga operatiba sa PNP Drug Enforcement Group Special Operations Unit (SOU)-7 sa marijuana plantation diha sa Camansilis, Pangimihan, Dakbayan sa Toledo sa miaging adlaw.
Giibot ug gisunog sa kapolisan ang 2,000 ka stalks sa fully-grown marijuana plants nga nagkantidad og P400,000; 200 kabuok marijuana seedlings nga mobalor og P8,000 ug duha ka kilo sa marijuana dried leaves nga nagkantidad og P240,000.
Sa kinatibuk-an niabot og P648,000 ang balor sa marijuana nga nasakmit sa kapolisan.
Nailhan sa kapolisan ang duha ka giingong tigtanom og marijuana sa lugar apan wala kini nadakpan.
Gihurot og sunog ang mga gipang-ibot nga marijuana plants, seedlings ug dried leaves samtang ang dapit nga gitamnan og marijuana gi-sprayhan og herbicide aron dili na kini motubo pagbalik. (BANAT NEWS)