DOTr modasig sa kabatan-onan pagkuha og kurso sa aviation

CEBU, Philippines — Ang Department of Transportation (DOTr) mopatuman og mga programa nga magdasig sa kabatan-onan sa nasud nga mopadayon og career sa aviation ug aerospace.

Atol sa 2024 Aviation Summit, gibutyag ni undersecretary Roberto Lim nga kini nga lakang kabahin sa mga paningkamot sa ahensya sa pagpausbaw sa human capital sa sektor sa aviation pinaagi sa pakigtambayayong sa aviation schools ug uban pang educational institutions.

Aron mas mapalambo pa ang kalidad sa edukasyon sa aviation, ang DOTr nagplano nga makigtambayayong sa Commission on Higher Education (CHED) ug sa Technical Education and Skills Development Authority (TESDA) aron sa pagmugna og national certification nga mga programa ug pagpauswag sa kapasidad sa teknikal nga instruksiyon.

Dugang pa, ang ahensya nag-awhag sa mga educational institution nga may kalabutan sa aviation nga magtukod og Philippine Association of Aviation Colleges and Institutions.

Kini nga asosasyon magsilbing plataporma alang sa hiniusang pagpalambo sa polisiya ug pagpalig-on sa kolaborasyon tali sa mga eskuwelahan sa aviation ug mga stakeholders sa industriya.

Tungod sa kakuwang sa mga personahe sa aviation sa tibuok kalibutan, gipadayag ni Lim nga kini usa ka talagsaong oportunidad alang sa kabatan-onan aron magtukod og malungtaron nga career sa sektor sa aviation. (BANAT NEWS)