CEBU, Philippines — Usa ka taxi driver ang niduso og certificate of candidacy alang sa pagka-konsehal sa Dakbayan sa Sugbu sa amihanang bahin sa Dakbayan sa Sugbo.
Ang 57-anyos nga si Abraham “Abdon Jr.” Alcontin Verdida, nga taga A. Salvador sa Barangay Labangon mao ang labing unang miduso sa iyang COC sa buhatan sa Comelec sa Dakbayan sa Sugbo kagahapon sa buntag.
Aduna nay pipila nga nakaila kang Verdida kay mang-libre kini og sakay sa iyang pasahero matag adlaw niyang natawhan ug lima ka tuig na niya kining gibuhat.
Gawas pa niana, mopa-raffle sab siya og tulo ka sakong bugas kada adlaw niyang natawhan kada tuig agi og pagpasalamat.
Matud pa niya nga gisuwayan ra niya ang iyang kapalaran sa politika kaniadto ug nilansar isip barangay konsehal apan napakyas kini.
Karon, desidido siya nga mangalagad sa syudad. Pulong pa niya nga dili ra sab siya mapriso kun dili siya makadaog apan buot niya nga palapdan ang iyang “libreng sakay.” Gitug-an niya adunay politiko ang mipasalig og suporta kaniya alang sa pagsustinir sa iyang pagpangampanya kun ugaling mahimo na siya nga opisyal nga kandidato alang sa piniliay karong Mayo 2025. — IBM BANAT NEWS