CEBU, Philippines — Usa ka suspetsadong drug personality ang nasikop atol sa buy-bust operation sa mga operatiba sa City Intelligence Unit sa Cebu City Police Office(CCPO) kagahapon sa kadlawon diha sa Sitio San Roque, Barangay Quiot, Siyudad sa Sugbo.
Ang suspetsado mao si Nicomedas Cabarrubias Tabar, hingkod ang panuigon, residente sa naasoy nga lugar.
Nasakmit sa kapolisan gikan sa suspetsado ang 160 ka gramong shabu nga nikantidad tanan sa kapin P1 milyon.
Nasayran nga gipaubos sa duha ka semana nga monitoring ang suspetsado human nakadawat og impormasyon ang kapolisan sa giingong ilegal niini nga kalihokan.
Giingong ang suspetsado maka-dispose kini og 200 gramo nga shabu kada semana diin ang area of operation niini mao ang mga barangay sa Pardo, Bulacao ug Quiot.
Kasong kalapasan sa Section 5 ug 11, Article II sa Akta Republika 9165 kun “Comprehensive Dangerous Drugs Act og 2002” ang ipasaka batok sa suspect. — /BDB (BANAT NEWS)