CEBU, Philippines — Usa ka mobile clinic ang naangkon sa lungsod sa Dumanjug alang sa pagpalambo sa serbisyo sa panglawas sa katawhan sa lungsod.
Ang P13.6 milyones nga mobile clinic giinagurahan atol sa gipahigayon nga caravan of government services sa Probinsya sa Sugbo sa municipal gym sa Dumanjug niadtong September 28, gipangulohan ni Gobernador Gwendolyn Garcia ug Mayor Efren Guntrano Gica.
Ang maong mobile clinic gipondohan sa lungsod ug sa probinsya sa Sugbo ug giabagan sa Probinsya sa Sugbo. Adunay kini “state-of-the-art” nga kahimanan o ekipo sama sa x-ray machine, laboratory, ultrasound, dental unit, ECG ug drug testing unit.
Sumala sa Capitol Information Office nga ang maong sakyanan gipaabot nga makahatag og dakong tabang ug serbisyo sa panglawas sa mga residente sa lungsod ug sa mga silingang lugar ilabina sa mga nagpuyo sa lagyong dapit sama sa mga nagpuyo sa bukirang bahin.
Samtang, P24 milyones usab nga subsidiya ang gibubo sa Kapitolyo sa walo ka lungsod atol sa caravan of services.
Ang tag P3 miyones nga cheke gihatag ni Garcia ngadto nila ni Dumanjug Mayor Efren Guntrano Gica, Ronda Mayor Terence Mariano Blanco, Alcantara Mayor Fritz Lastimoso, Moalboal Mayor Inocentes Cabaron, Badian Mayor Carmen Lumain, Alegria Mayor Gilberto Magallon, Malabuyoc Mayor Erlinda Piedad, ug Ginatilan Mayor Roy Vincent Singcco.
Ang maong kantidad gamiton sa mga LGUs sa pagpatuman sa proyekto sa imprastraktura sa tagsa tagsa niini ka lungsod. — /MEL (BANAT NEWS)