Bag-ong polisiya sa whale shark watching wa kaayo mapahibawo

CEBU, Philippines — Nangayo og pasaylo ang Oslob Tourism Office ug ang Tan-awan Oslob Sea Warden and Fishermen’s Association (TOSWFA) ngadto sa grupo sa mga turista nga wala makapahigayon og whale shark watching tungod sa sayo nga pagpahunong sa registration.

Ang maong insidente nag-viral sa social media ug niabot sa buhatan sa Oslob Tourism.

“We acknowledge the inconvenience this caused our guests, and we sincerely apologize for the lack of communication regarding this policy adjustment” pagbasa sa pamahayag sa OslobTourism Office ug sa TOSWFA.

Sumala pa sa maong buhatan, aduna nay polisiya nga gipatuman didto sa Tan-awan kalabot sa pagpahigayon og whale shark watching diin adunay sayo nga “cut-off” sa pagparehistro kon wala nay umaabot nga turista sa dili momenus 30 ka minutos.

Apan giangkon usab sa tourism office nga wala kini kaayo mapahibalo sa ilang social media.

Dugang pa niini nga ang pag-usab sa polisiya gihimo tungod sa praktikal nga rason alang sa tinguha nga mapalambo ang ilang serbisyo.

Bisan og daghan sa mga lokal nga operators ang nasayod na sa maong polisiya, nakasabot usab ang tourism office nga kinahanglan adunay halapad nga pagpahibalo sa impormasyon ang gihimo aron malikayan nga adunay dili pagkasinabot ug kalibog ilabina sa mga turista.

Buot usab ipaklaro sa lokal nga kagamhanan sa lungsod sa Oslob nga ang bisa’g unsa nga operasyon, polisiya ug feedback sa ilang serbisyo, adto lang gyud ipadangangat sa saktong channel o sa ilang buhatan aron kini mahatagan og katin-awan ug aksyon dayon.

Ang whaleshark watching sa Oslob diin ang mga bisita mamahimong makakita ug makalangoy uban sa mga butanding sa Oslob, maoy usa sa mga sikat nga tourism destination sa Probinysa sa Sugbo. — /MEL (BANAT NEWS)