CEBU, Philippines — Nidangop sa Candijay Police Station sa Bohol Police Provincial Office (BPPO) ang usa ka 61-anyos nga inahan ug gireklamo ang 40-anyos niyang anak nga milugos kaniya kaniadto ug ning bag-o; Samtang sa Dakbayan sa Naga, usa ka amahan sab ang gipadakop sa iyang anak kay giingong gihinol siya niini.
Sa Bohol, si Police Captain Albert Sator, hepe sa Candijay Police Station miingon nga nahitabo ang pagpanglugos alas 5 sa buntag sa adlaw'ng Biyernes, Septiyembre 27, 2024.
Base sa ilang interview sa biktima kini mitug-an nga dihang 4-anyos pa lang ang iyahang anak nga suspek nabiyaan niya kini apan iyang gikuha ug nag-ipon sila og puyo sa usa ka balay sa Davao.
Mitug-an ang biktima nga dihang nag edad og 20-anyos ang suspek gilugos siya niini apan wala siya motug-an sa otoridad kay gibaharan siya nga patyon.
Pagtungtong sa suspetsado sa edad nga 24-anyos nakapatay ang iyang anak ug nasentensyahan og 14 ka tuig nga pagkabilango ug niadto lang Septiyembre 18,2024 kini nakagawas.
Ang biktima dayun matud pa ang gipangita sa suspek hangtud nga nahibaw-an pinaagi sa stepbrother niini nga naa sa Lungsod sa Candijay magpuyo ang inahan niini kay ang ikaduhang bana niini taga didto sa maong lungsod ug didto kini mipauli.
Niadtong Biyernes sa alas 5 sa buntag samtang natulog ang biktima niabot gikan nibilar sa haya ang suspek. Matud pa nakainom kini ug mitupad og higda sa biktima ug diretso kining gigagok ug gilugos.
Giingong gibaharan na sab siya niini nga patyon kun motug-an. Apan ning higayona wala na magpadala sa kahadlok ang biktima ug nidangop siya sa barangay.
"Dili naman gyud maantos sa inahan nisumbong gyud intawon pinaagi sa Barangay Kapitan didto sa atong barangay ug diri sa atoa atong gi conduct og follow-up operation atong nadakpan ang suspetsado," sigon ni Sator.
Nasayran nga sa balay kuyog sa biktima ang laing anak niini nga babaye nga dunay kakulian sa panglawas ug nakasaksi sa panghitabo.
Samtang sa dakbayan sa Naga usa ka amahan ang gidakop human gisumbong sa
12-anyos niining anak nga dalagita ngadto sa magtutudlo niini bahin sa malaw-ay niining gibuhat kaniya samtang siya natulog.
Ang grade 7 nga tinun-an nisumbong nga nakamata siya nga dunay mihawok sa iyang ngabil ug nakugang siya nga ang iyaha kining 40-anyos nga amahan. Matud pa gihinol niini ang pribadong parte sa iyang lawas.
Nianang pagkabuntag wala maglangay ang bata pagsumbong ngadto sa iyang maestra ug kini maoy niduol sa kapolisan hinungdan sa pagdakop sa amahan sa bata.
Kasong kalapasan sa Republic Act 8353 kun Anti-Rape Law ang atubangon sa duh aka suspek samtang ang amahan may kalambigitan ang iyang kaso sa RA 7610 o Child Abuse.-- IBM BANAT NEWS