Tag-iya sa tulo ka Indonesian passports gipangita
CEBU, Philippines — Gisubay karon sa National Bureau of Investigation kun asa ang mga tagiya sa tulo ka mga Indonesian Passports nga nakuha gikan sa usa sa mga safety vault nga ilang giablihan niadtong Huwebes atubangan sa mga testigo ug huwes.
Ang maong safety vaults nasakmit sa gironda nilang gituohang Philippine Offshore Gaming Operation sa Brgy. Agus sa Dakbayan sa Lapu-Lapu.
Giklaro sa NBI-CEVRO nga ang tanang na-rescue ug ang mga nasikop nga 169 ka mga langyaw sulod sa maong POGO hub adunay mga passports, apil na sab ang mga nahaunang Indonesians nga nakaikyas nga nagpatabang sa mga ototidad nga maoy yawe sa pagkadiskubre sa maong operasyon.
Nahibulong ang NBI kun si kinsa ang tag-iya sa tulo ka mga Indonesian Passports ug asa na sila karon.
Matud pa ni Atty. Renan Augustos Oliva, ang Regional Director sa NBI-CEVRO ang maong mga langyaw nakasulod gayud sa nasod ug dili usab mamahimong makagawas kay naa pa man ang ilang mga passports. Ang NBI wala na mobutyag sa identity sa mga passport holders pero puros kini mga hamtong na.
Nakig-alayon na usab sila karon sa Bureau of Immigration ug sa Indonesian Embassy mahitungod sa record sa tulo.
Atol sa pagabli sa maong mga vaults adunay nakuhang 241 ka mga cellphones, mga yawe sa sakyanan ug kadtong tulo ka Indonesian passports.
Matud pa ni Atty. Wenceslao Galendez, Supervising Agent NBI-CEVRO, posibleng anaa sa mga cellphones ang mga transaksyon sa illegal nga kalihukan apil na ang dagan sa kwarta nga proceeds niini nga gipaagi sa E-wallet transaction.
Dugang pa ni Galendez, nagkinahanglan pa sila og kamanduan sa korte aron maablihan kini. Avie Villa/IBM BANAT NEWS
- Latest
