CEBU, Philippines — Gipusil ug namatay ang usa ka miyembro sa LGBT Community sa panimalay niini sa Sitio Ihawan, Barangay Poblacion, Lungsod sa Sibonga, pasado alas-8 sa gabii sa adlaw'ng Miyerkules.
Ang biktima mao si Roderick Hong, 41, miyembro sa LGBT community ug residente sa naasoy nga dapit.
Sa impormasyon sa Sibonga Police Station nga alas 8:20 sa gabie sa adlaw'ng Miyerkules, bag-o lang naabot sa giabangang balay ang biktima sa dihang usa ka wala mailhing tawo ang nanuktok sa pultahan. Giablihan kini sa biktima ug didto kalit kining gipusil makaduha ka higayon.
Nakit-an sa CCTV footage ang mamumuno nga nagsul-ob og helmet nga dali-daling misibat ug misakay og motorsiklong gibilin niini daplin sa karsada human sa krimen.
Gidala pa ang biktima sa Carcar District Hospital apan nakabsan gyud kini sa kinabuhi. Padayon pa ang imbestigasyon sa otoridad ilabi na sa motibo sa maong krimen. — IBM BANAT NEWS