CEBU, Philippines — Mokabat sa 100 ka mga indibidwal nga nawad-an og trabaho sa Barangay Cambinocot, dakbayan sa Sugbo, ang nakadawat og hog raising livelihood assistance package gikan sa Department of Labor and Employment (DOLE) Region 7.
Gipahigayon ang seremonyas sa pag turn-over sa hinabang diha sa gym sa Barangay Cambinocot, diin ilang nadawat ang mga baktin; mga sako sa starter feeds ug grower feeds; vitamins ug; dewormer.
Nagkanayon si DOLE Tri-City Field Office (TCFO) Chief, Marites G. Mercado, nga maoy nagrepresentar kang DOLE-7 Regional Director, Lilia A. Estillore, nga ang matag benepisyaryo nakadawat og livelihood assistance package nga nagkantidad og sobra sa P29,000.00, uban sa ilang mga pigpen isip counterpart.
Ang maong livelihood grant release kabahin sa P3.2 million nga balor sa livelihood assistance nga gipagawas sa DOLE-7 nga nakabenepisyo sa mga mag-uuma, vendors, kanhi security guards ug uban pang mga trabahante nga nawad-an og trabaho sa dakbayan sa Sugbo.
Niadtong Agosto 31, 2024, personal nga gihatag ni Director Estillore ang mga jigs, mga ekipo ug materyales sa unang batch sa mga benepisyaryo didto sa DOLE Regional Office.
Ang mga ekipo ug materyales gamiton sa mga proyekto sama sa rice retailing; sari-sari store; pamaligya og mani; paghimo og furniture ug; fresh dresses chicken selling.
Tulo sa mga benepisyaryo mga kanhi security guards sa DOLE-7, nga mosulod sa negosyo nga rice retailing. — MEL BANAT NEWS