Asturias usa na ka first class municipality

CEBU, Philippines — Gikan sa usa ka third class municipality, usa na karon ka first class municipality ang lungsod sa Asturias. Ang lokal nga kagamhanan sa Asturias pinaagi sa Public Information Office niini mipahibalo kagahapong adlawa nga usa na ka first class municipality ang lungsod.

“Ang pagka first class municipality usa ka pruweba sa atong pagka-produktibo, pagka-malampuson, ug pagka-maalamon. Kini usa ka pag-ila sa atong mga kalampusan, sa atong mga pangandoy, ug sa atong padayon nga paglambo” sumala sa LGU. Base sa Akta Republika (RA) No 11964 o ang Automatic Income Classification o Local Government Units Act nga gipirmhanan isip usa ka balaod ni Presidente Ferdinand Marcos Jr. niadtong Oktubre 26, 2023, ang usa ka first class nga munisipalidad kinahanglan adunay dili momenus P200,000,000 nga tinuig nga kita.

Ang second class nga munisipyo kinahanglan dili momenus P160, 000, 000 apan ubos ra sa P200, 000, 000 ang regular nga kita matag tuig; third class kinahanglan naa sa P130 million ngadto sa P160 million ang tinuig nga kita; fourth class anaa sa P90 million ngadto sa P130 million ug ang fifth class kinahanglan dili mosobra sa P90 million.

Ang RA 11964 maoy nag-update sa income classification sa mga LGUs base sa pinansyal nga kapabilidad niini.

Unang gikataho nga ang Asturias apil sa dul-an 20 ka mga LGUs sa Probinsya sa Sugbo nga gikatakdang mahimong first class nga munisipalidad apil na niini ang Consolacion, Minglanilla, Liloan, Bantayan, Daanbantayan, Argao, Tuburan, Dalaguete, Barili, Pinamungajan, Cordova, San Remegio, Carmen, San Francisco, Dumanjug, Compostela, Sibonga, ug Moalboal. — MEL BANAT NEWS