CEBU, Philippines — Nasikop ang usa ka 20-anyos nga dalaga kinsa giila nga usa ka high value individual sa atol sa buy-bust operation sa City Intelligence Unit/City Drug Enforcement Unit diha sa Realty Street, Barangay Subangdaku, Dakbayan sa Mandaue niadtong Martes sa gabii.
Ang suspetsado mao si Jenny Macalisang, alyas “Papart”, taga Mahayahay A. Lopez St., Barangay Calamba, Dakbayan sa Sugbo.
Nasakmit gikan sa suspetsado ang 500 gramong shabu nga nibalor ngadto sa P3.4 milyones ug buy-bust money. Gikataho nga ang suspetsado makadispatsar kini og 500 gramong shabu matag semana.
Ang suspetsod kinsa natingkagol karon sa detention cell sa kapolisan Dakbayan sa Mandaue ang padayon pa kining gipaubos sa imbestigasyon.
Sa laing bahin, niabot sa dul-an P1 bilyon ang balor sa ilegal nga drugas ang nasakmit sa Police Regional Office-7 sulod sa walo ka buwan nila nga operasyon batok ilegal nga drugas karong tuiga.
Gikan sa Enero 1 hangtud sa Agosto 31, 2024 niabot sa 4,818 ka police operations ang gipahigayon sa PRO-7 diin niabot sa 144,149.89 gramong shabu nga nikantidad tanang ngadto sa P980,219,252 ang nasakmit.
Gawas niini, nasakmit usab kapolisam ang 1,630.02 gramong pinaugang dahon sa sa marijuan, 28,061 ka tanom ug 2,000 ka stalks nga nagkantidad tanan sa P6,057,802.40.
Niabot ngadto sa 1,055 ka ampules nga Nubian nga nagkantidad og P121,325 ang naskamit usab sa kapolisan ug 5,628 ka drug personalities ang nasikop. — Decemay P. Padilla/BDB BANAT NEWS