Ombudsman duna nay resolusyon sa nepotism case batok ni Rama

CEBU, Philippines — Ang Office of the Ombudsman nakakita og probable cause aron pasakaan og kaso si Cebu City Mayor Michael Rama, kinsa ubos na sa preventive suspension, tungod sa mga reklamong kriminal sa tulo ka ihap sa Anti-Graft ug corrupt practices.  Kini nga hukom gipirmahan ni Deputy Ombudsman for Military and Other Law Enforcement Offices (MOLEO).

Ang giingon nga resolusyon naggumikan sa criminal complaints nga gipasaka niadtong Pebrero 28, 2023 sa reklamante nga si Jonel B. Saceda aka Inday Josa Chongbian Osmeña batok kang Rama tungod sa paglapas sa Section 3 (e) sa Republic Act No. 3019 (R.A. 3019). Ang pasangil naggumikan sa pagtudlo ni Rama sa iyang mga bayaw nga sila si Elmer Gimenez Mandanat ug Gomer Gimenez Mandanat isip mga kaswal nga empleyado sa dakbayan sa Sugbo.

Si Elmer ug Gomer mga igsuon ni Marilou Gimenez Mandanat-Rama, kinsa gikasal kang Rama sa usa ka civil wedding ceremony niadtong Oktubre 28, 2021.

Base sa talaan sa Human Resource Department Office (HRDO) sa kagamhanan sa dakbayan sa Sugbo, partikular na sa Plantilla of Casual Appointments (Reappointment-Renewal), si Rama giingong mitudlo ni Elmer isip Process Server ubos sa Office of the Mayor gikan sa Enero 1, 2022 hangtud Hunyo 30, 2022.

Si Rama usab giingong nitudlo kang Gomer isip Administrative Aide III (Laborer Il) ubos sa Cebu City Medical Center (CCMC) sa samang panahon.

Matud pa niini, “nepotistic” ang appointment ni Elmer ug Gomer ug nagsulti nga ang "mga iregularidad klaro kaayo sa mga dokumento".

Suma pa ni Atty. Joselito Baena, usa sa legal team ni Rama nga sa pagkadawat sa kopya sa resolusyon niadtong Lunes, ang kinatibuk-ang legal team mihimo dayon sa ilang motion for reconsideration nga ilang gilantaw nga opisyal nga isumite karong semanaha.

Matud ni Baena nga andam silang motubag sa resolusyon “head on” ug masaligon nga makab-ot ni Rama ang “hustisya”. Bisan pa sa maong hukom, iyang gisubli nga moduso gihapon si Mayor Rama sa iyang Certificate of Candidacy (COC) ug miingon nga dili kinj makaapekto sa iyang pagdagan pagka mayor.

Ang RBTA Law, legal counsel ni Rama nagpatawag og press conference kagahapon, usa nila si Atty. Mikel Rama, anak ni Rama, ug niingon nga giandam na ang mga argumento aron masalikway ang mga elements sa paglapas sa anti-graft and corrupt practices act.—  MEL BANAT NEWS