CEBU, Philippines — Usa ka 39-anyos nga lalaki ang nadakpan atol sa pagpangronda sa kapolisan sa Dakbayan sa Lapu-Lapu gumikan sa ilegal niini nga paghupot og armas.
Ang maong lalaki ang mag-atubang usab og kasong murder tungod sa iyang pagdunggab patay sa iyang kauban sa trabaho.
Si Police Lieutenant Colonel Christian Torres, tigpamaba sa LCPO nagkanayon nga ang nadakpan mao si “Adan”, usa ka construction worker sa Barangay Punta Ingaño, Dakbayan sa Lapu-Lapu ug suspetsado usab kini sa pagpanunggab sa 32-anyos nga construction worker nga Sitio Sudtonggan sa Barangay Basak sa nahisgutang siyudad.
Matud ni Torres nga gialarma kini sa mga molupyo Sitio Mangal, Barangay Punta Ingaño nga nagbahis ug nagpakita sa gidala niining armas nga revolver.
Ang mga molupyo sa lugar dali nga nakatawag sa kapolisan sa Presinto 2 sa LCPO diin naabtan sa mga polis ang suspetsado nga nag-tuck-in pa sa iyang armas hinungdan nga gidakop human wala makapresentar og mga dokumento sa armas niining gidala. Base sa imbestigasyon nga ilang gihimo ilang nahibaw-an nga mao usab kini ang nagdunggab patay sa iyang kauban sa trabaho. — BDB BANAT NEWS