CEBU, Philippines — Nadakpan sa kapolisan sa Labangon Police Station sa Cebu City Police Office ang usa ka snatcher ug giingong tulisan dihang girespondehan ang alarma sa armadong tawo diha sa Sabellano Street, Barangay Punta Princesa, siyudad sa Sugbo, Martes sa gabii.
Ang nadakpan mao si Ken Baclayon Tugahan, 20 anyos, residente sa sitio Upper Suran, Barangay Kinasang-an Pardo.
Girespondehan sa kapolisan ang alarma sa armadong tawo sa nahisgutang dapit og pag-abot nila sa lugar naaktuhan ang suspek nga nagdala-dala og .38 calibre revolver nga dunay usa ka buhing bala.
Base sa imbestigasyon sa otoridad ang suspek giingong usa ka notadong snatcher ug manulis usab kini sa mga pasahero sa jeep diha sa Natalio Bacalso Avenue.
Nadakpan na usab kini kaniadto sa kasong pagpanglabni ug pagpanulis.
Kasong kalapasan sa Republic Act 10591 ang ipasaka batok sa suspetsado. —MEL BANAT NEWS