CEBU, Philippines — Dili pa gihapon madawat hangtod karon sa amahan sa 18-anyos nga dalagang tinun-an nga gipatay sa sud sa usa ka lodge ang gidangatan sa iyahang anak.
Ang amahan nga si Albino Tagactac, miingon sakit ang nahitabo sa ilang anak nga babaye kinsa gigaid ug wala nay kinabuhi sa dihang napalgan sa mga roomboys sa usa ka lawak sa lodging house sa Barangay Poblacion, Dakbayan sa Toledo niadtong Septiyembre 20, 2024.
Gipangita na karon sa kapolisan ang gitumbok nga kataposang kauban sa biktima nga si Lorben Cabugsan Larot alyas Richard kinsa giingong suspek sab sa pagpatay sa kaugalingon niining amahan nga retiradong polis sa Misamis Oriental.
Gipa-autopsy na sa miaging adlaw ang patay’ng lawas sa biktima sumala pa sa tigpamaba sa Cebu Police Provincial Office(CPPO) nga si Police Major Ian Macatangay apan wala pa ang resulta, dunay mga pagdudang gilugos kini una pa gipatay.
“For the cause of death IOC of Toledo City naa tay nakit-an didto nga syempre hogtied gyud to siya and gibutngan sad siya og handkerchief sa iyahang mouth, ang atoang cause of death regarding sa ilahang police report wala pa since it is still to be examined,” sigon ni Macatangay.
Gipasabot ni Macatangay kun dili man madakpan dayun sa hot pursuit operation ang suspek mahimo gihapon nilang ipasaka ang kaso kay nailhan naman kini.
Matud pa sa imbestigasyon, sa Facebook nagkaila ang duha. Ang kapulisan nipahimangno sa mga ginikanan nga monitoron kanunay ang ilahang anak ilabi na nga expose sila pirme sa social media.
Sa pikas bahin, nakig-alayon na karon ang Balamban Police Station sa kapolisan sa Leyte aron madakpan ang suspetsado nga gitumbok nga midakdak og barbel ug midunggab sa kauban niini sa gitrabahoang poultry farm diha sa Barangay Biasong sa maong lungsod nidatong Septiyembre 22, 2024.
Ang biktima giila nga si Marjun Andaya samtang ang gipangita karon mao ang kaubang taga Leyte nga si Wenbie Delima nga gikatahong daling miikyas ug gikataho dayon nga nasigpatan didto sa ilang probinsya pagkasunod adlaw.
Sigon ni Police Major Ian Macatangay, tigpamaba sa Cebu Police Provincial Office(CPPO) nga murder nga kasong ipasaka batok sa suspetsado.
Gikatahong nagkabingkil ang duha didto palang sa ilang gipamistahan ug nagkasumbagay apan gilupig sa biktima ang suspek maong nagdumot kini hangtud sa ilang pagbalik sa trabahoan ug didto kini mibawos pinaagi sa pagdakdak og barbell sa nawong niini ug gidunggab sab kini nga nakaingon sa iyang kamatayon. (BANAT NEWS)