CEBU, Philippines — Si Acting Cebu City Mayor Raymond Alvin Garcia nipadayag nga bukas kini sa pagdagan isip mayor sa siyudad sa 2025 midterm election.
Si Garcia nipadayag sa mao niyang tinguha atol sa gipahigayong oath taking sa opisyales sa partido Kugi Uswag Sugbo (KUSUG) kagahapon diha sa usa ka hotel sa Dakbayan sa Sugbo nga gipangulohan sa party chairman nga si kanhi mayor Alvin Gacia.
Matud ni Garcia bukas siya sa pagdagan pagka-mayor ug bukas siya sa tanang oportunidad apan sa pagkakaron nagpahigayon pa sila sa pagpalig-on sa ilang partido.
Ang opisyales nga niapil sa oath taking gilangkuban ni Garcia isip presidente; Konsehal James Anthony Cuenco, executive vice president; Konsehal Edgardo “JP” Labella II, bise presidente sa north district; Konsehal Renato “Junjun” Osmeña, bise presidente sa south district; Konsehal Joel Garganera, secretary general; Konsehal Rey Gealon, treasurer, Konsehal Jerry Guardo, auditor ug Konsehal Jun Pastor Alcover, PRO.
Pipila usab sa opisyales sa barangay ang nitambong sa maong oath taking kinsa nipakita sa ilang suporta sa maong partido.
Si Garcia nagkanayon nga pipila ka adlaw sa dili pa ang pagduso sa certificate of candidacy mopagawas usab sila sa ilang kaugalingong listahan. Mapasalamaton si Garcia sa gipakita nga suporta kaniya sa 80 ka barangay.
Samtang si Alcover nagkanayon nga dili sila ang nibiya kang suspended Mayor Michael Rama uban sa pipila ka opisyales apan sila maoy gibiyaan human nga nideklara kini nga independent ug walay giisa nga kamot sa mga kapitan panahon sa eleksiyon sa barangay.
Si Rama wala kini mohatag og tubag sa mga pamahayag sa pipila ka mga konsehal ilabi na wala pa kini sila makaduso sa certificate of candidacy.
Gibutyag ni Rama nga mopahigayon usab sila og kalihokan nga mopahibalo usab sa ilang kaugalingong partido.
Samtang sa Dakbayan sa Carcar, si kanhi mayor Mercedita "Mercy" Apura hingpit na usab nga nipaila sa iyang Green Team nga line-up alang sa sunod tuig nga eleksiyon.
Ug posibleng makauban ni Apura ang incumbent Vice Mayor Efren Quijano.
Molangkub sa partidado ni Apura sa pagka konsehal mao sila si kanhi mayor Nice Apura, mga incumbent nga konsehal nga sila si Victor Ian del Rosario , Mae Tabora, Mitch Zozobrado ug mga bag-ong pangalan nga nisulbong nga sila si Kashi dela Cerna, Kimbox Lapinid, Richard Barangan, Marco Espiritu, Ed Lawas, ug Carlo Aldemita. (BANAT NEWS)