Cañete gitudlong direktor sa CCPO

CEBU, Philippines — Hingpit nang gitudlo kagahapon ni Acting Cebu City Mayor Raymond Alvin Garcia si Police Colonel Antonnieto Cañete isip permanente nga city director sa Cebu City Police Office. 

Matud ni Garcia nga daan na niyang gibutyag nga satisfied siya sa performance nga gihimo ni Cañete ilabi na sa pagpahigayon sa tanan niyang gimando niini.

Matud ni Garcia nga gihimo ni Cañete ang pagpahigayon sa police visibility sa siydad lakip na ang pagsaoy-saoy sa mga patrol car diha sa kadalanan o makita kini nga anaa sa mga strategic places nga nag-blinker ug anaa ang presensiya sa kapolisan.

Gilakbit ni Garcia ang kabahin sa mga nalambigit sa pagpanulis sa jewelry diin napasakaan na kini og kaso.

Gipadayag ni Garcia nga dili malikayan nga adunay mga mahitabo nga krimen hinungdan iyang mando nga pangitaon sa kapolisan ang naghimo sa krimen ug pasakaan og kaso aron mopatigbabaw ang hustisya.

Dugang ni Garcia nga daghan sa mga kaso ang kalambigitan sa ilegal nga drugas hinungdan nga kinahanglan kining hatagan og seryoso ug agresibo nga approach sa kapolisan gawas sa police visibility. (BANAT NEWS)