CEBU, Philippines — Na-recover sa Labangon Police Station sa Cebu City Police Office (CCPO) ang motorsiklo nga gigamit ni Jessie Cañete ug mga kauban niini dihang nanulis sila niadtong Domingo sa kadlawon diha sa Barangay Tisa, Siyudad sa Sugbo.
Matud ni Police Major Eraño Regidor, hepe sa Labangon Police Station nga niadtong Domingo sa gabii gikuyogan sa suspetsado ang kapolisan diha sa Barangay Ermita diin na-recover ang NMAX nga motorsiklo.
Ang Labangon Police Station nakig-alayon kini sa Carbon Police Station sa ilang pagpahigayon og operasyon.
Ang motorsiklo nga na-recover ubos sa kustodiya sa Labangon Police Station gamiton kini isip dugang ebidensiya batok kang Cañete ug sa laing lima ka kauban niini apil ang ilang giingong lider si alyas “Etchay” nga gituohang maoy tag-iya sa motorsiklo nga na-recover.
"Puro ni sila taga Cebu City in fact puro ni sila e-bike drivers, e-bike drivers sila sa buntag inig gabii mag-sideline sila panulis", butyag ni Regidor.
Giingong si Cañete nitug-an nga usa ka buwan na nga natukod ang ilahang grupo ug ang magmando kanila si Etchay nga taga Barangay Ermita.
"Usa ra sila ka grupo usahay duha sila ka motor depende ra sa available sa kauban nila nga unom, usually mag-inusara lang motor na sila if naay laing members mokuyog mao nang magduha na sika ka motor unya ang ilang area of coverage sa iyang gidiga nato moabot sila Talisay in fact abot sab sila og Mandaue diay sa ilang igo", matud ni Regidor.
Kasong kalapasan sa Akta Republika 10591 kun “Illegal Possession of Firearms”, Section 11, Article II sa Akta Republika 9165 kun “Comprehensive Dangerous Drugs Act og 2002” apil ang “Robbery with Violence, Intimidation of a Person Utilizing Firearms”. (BANAT NEWS)