CEBU, Philippines — Patay ang usa ka poultry boy human kini gidakdakan og barbel ug pagkahuman gidunggab sa diha sa usa ka poultry farm sa Barangay Biasong, Lungsod sa Balamban niadtong Domingo sa kaadlawon.
Ang biktima mao si Marjun Andaya, hingkod ang pangidaron lumad nga taga Negros Island, samtang mikagiw dayon ug wala na mopakita ang suspek nga kauban ra sa biktima sa trabaho nga si Wemby Delima nga taga Leyte.
Ang maong krimen nakuha sa CCTV footage sa farm nga nikatap karon sa social media. Makita didto nga nagkuha og barbell si Delima dayon misulod sa usa lawak nga gituohang nahimutangan sa biktima ug madungog sa video ang siyagit sa usa ka lalaki.
Ang caretaker sa maong farm maoy nakadiskubre sa krimen. Matud pa pwerteng gubaa sa nawong sa biktima nga gituohang inagian sa pagdakdak og barbel.
Nakita sab sa kapolisan nga aduna usab kini dinunggaban sa ilok. Gisuwayan pa gyud unta sa mga kauban nga dad-on sa tambalanan ang biktima apan nakabsan gayud sa iyang kinabuhi.
Matud pa sa mga kawani sa farm nakakita sila nga nagkadugo ang kamot sa suspetsado apan wala sila manumbaling kay nagtuo ra sila nga nagsukmagay sila sa biktima.
Ang suspetsado nibahad sa iyang mga kauban nga dili manginlabot og mag-apil-apil kay balikon sila niini sa higayon nga mosumbong sila sa kapulisan.
Gisusi karon sa kapolisan ang report nga sa wala pa ang krimen nag-uban pa ang duha nga namista apan didto nagkabikil ug nagsumbagay. Gikataho nga nasuko ang suspek kay nalupig kini sa biktima.
Ang kapulisan sa balamban pinangulohan ni Police Lieutenant Colonel Julius Garcia, nakig-alayon na karon sa Tabango Municipal Police Station sa Leyte alang sa ilang gihimo nga hiniusa nga manhunt operation.
Dugang pa ni Garcia, base sa ilang pakig-alayon sa kapulisan sa Tabango giingong spotted ang suspetsado sa maong dapit apan giingong dali nga nakaikyas. Ang suspetsado sumala pa sa kapulisan aduna usab kini mga kaso nga naglakip sa murder ug kawat. (BANAT NEWS)