CEBU, Philippines — Patay ang usa ka babayeng negosyante og karne human siya gipusil sa iyang kaugalingong bana samtang nangaon kilid sa karsada sa Nacario, Barangay Tabunok, Dakbayan sa Talisay niadtong Domingo sa gabii.
Ang biktima mao si Ailyn Francisco, nga taga Campo 2, Barangay Jaclupan sa nahisgutang Syudad. Ang suspek mao ang bana niyang si Rodino Francisco.
Base sa inisyal nga imbistigasyon sa kapolisan nasuta nga nangaon lang daplin sa karsada ang biktima uban sa iyang mga paryente nianang tungora.
Apan kalit nga naabot ang suspek nga nagmaneho og motorsiklo nga wala magtaptap sa dagway niini nga nagsul-ob og itom nga long sleeve shirt ug shorts. Walay daghang estorya nibunot kini og armas dayon gipusil ang biktima.
Dalidaling misibat ang suspek samtang ang mga paryente sa ginang nidala kaniya ngadto sa Cebu South Medical Center apan patay na kini.
Si Police Lt. Col. Epream Paguyod, hepe sa kapolisan sa Talisay nibutyag nga selos ang motibo nga ilang gitan-aw. Padayon karon ang hot pursuit operation sa pagdakop sa suspetsado. (BANAT NEWS)