CEBU, Philippines — Gihatagan sa siyudad sa Mandaue og livelihood financial assistance ang 150 ka mga molopyo nga nagtinguha sa pagbukas og ginagmay nga patigayon sa siyudad.
Ang maong mga molopyo nga nahimong benepisyaryo ang nakadawat og tag P10,000 nga tabang pinansyal.
Ang mga benepisyaryo naggikan sa lima ka barangay sa siyudad sa Mandaue nga naglakip sa Cabancalan, Casuntingan, Labogon, Looc, ug Umapad.
Suma ni acting Mandaue City mayor Glenn Bercede nga gihatagan og pagtagad sa Mandaue City ang pagtabang sa mga gagmayng negosyante aron makasustinir kini sa ilang puhonan sa negosyo ingon man sa ilang panginabuhi.
Si Bercede giubanan usab sa mga konsehales sa siyudad nga sila si Jimmy Lumapas ug Maline Cortes-Zafra, ingon man ABC President Dante Borbajo nga nihatag sa livelihood financial assistance. Nunot niini ang mga benepisyaryo nagpasalamat usab sa ilang nadawat nga ayuda gikan sa kagamhanan sa dakbayan. (BANAT NEWS)