CEBU, Philippines — Nakasinati karon og mga kausaban sa agianan sa siyudad sa Lapu-Lapu nonot sa gipatuman nga re-routing sa dakbayan gumikan sa pagtrabaho sa drainage project.
Lakip sa naapektuhan mao ang mga dalan sa barangay Basak tungod kay ang karsada sa sitio Kagudoy ang temporaryong nga gisiradan tungod kay nagsugod na ang kontraktor sa pag trabaho sa proyekto.
Ang karsada gisirad-an sugod niadtong Septiyembre 19 nonot sa pagsugod na sa kontrator sa pag-trabaho diin nakamugna gyud og pagkabalda sa dagan sa trapiko.
Nakasinate usab og mga kausaban sa rota sa sitio Kinalumsan sa Barangay Gun-ob nga milungtad na og tulo ka semana ang pagtrabaho sa drainage project sa maong dalan.
Subay niini gihangyo ang katawhan ilabi na ang mga commuters sa pagsabot sa nasinate nila nga kahasol. Si City Traffic Management System (CTMS) field inspector Roderick Dano miingon nga gihimong temporaryo lang ang pagsirado samtang nagpadayon pa ang pagtrabaho sa proyekto.
Apan siya mipasalig nga mahibalik ang normal ug naandan nga rota sa higayon nga mahuman na ang pagtrabaho sa drainage sa maong mga lugar. (BANAT NEWS)