Drug raid sa Bohol, dul-an P4 milyong shabu ang nasakmit

CEBU, Philippines — Tulo ka mga drug personalities ang nadakpan sa managlahing drug-bust operation sa kapulisan sa Probinsya sa Bohol sa miaging adlaw. Duha ka mga suspetsado ang nadakpan sa mga operatiba sa Tagbilaran City Police Station sa Barangay Cabawan, Tagbilaran City  nga sila si Dustin Galao, 29 anyos, residente sa Purok 6, Barangay Dao, Tagbilaran City ug kauban nga si Lord Rizali Acain, 38 anyos, nagpuyo sa San JoseStreet, Barangay Cogon, Tagbilaran City. Nasakmitan ang mga suspetsado og 315 gramos nga shabu nga nagkantidad og P2.1 million ug ubang drug paraphernalia.

Sa lahi nga buy-bust operation, ang ikatulong suspetsado nadakpan sa Barangay Totolan, Lungsod sa Dauis diin nakuhaan kini og 260 gramo nga shabu nga nagkantidad og P1.7 million ug mga drug paraphernalia. Ang maong operasyon gipangulohan sa Provincial Drug Enforcement Unit uban ang Dauis Municipal Police Station ug PNP Drug Enforcement Group/Special Operation Unit-7 sa Bohol Police Provincial Office.

Ang mga ebidensya nga nasakmit sa maong operasyon gisumetir na sa Forensic Unit alang sa analysis.  Kasong kalapasan sa Republic Act 9165 ang ipasaka batok sa mga suspetsado.   "The interdiction of these drugs not only disrupts criminal networks but also underscores the importance of an aggressive and relentless anti-drug campaign and collaboration with the people of Central Visayas,”  sigon ni PBGen Anthony Aberin, Regional Director sa Police Regional Office-7. (BANAT NEWS)